यजुर्वेद
यजुर्वेद- अध्याय 33, (yajurved Adhyay 33)
॥ अथ यजुर्वेदः
॥
अध्याय
33
यजुर्वेदः-संहिता
| अध्याय 33, मंत्र 1
अस्याजरासो
दमाम् अरित्रा ऽ अर्चद्धूमासो ऽ अग्नयः पावकाः ।
श्वितीचयः श्वात्रासो भुरण्यवो वनर्षदो वायवो न सोमाः
॥
यजुर्वेदः-संहिता
| अध्याय 33, मंत्र 2
हरयो धूमकेतवो
वातजूता ऽ उप द्यवि ।
यतन्ते वृथग् अग्नयः ॥
यजुर्वेदः-संहिता
| अध्याय 33, मंत्र 3
यजा नो मित्रावरुणा
यजा देवाम्̐ २ऽ ऋतं बृहत् ।
अग्ने यक्षि स्वं दमम् ॥
यजुर्वेदः-संहिता
| अध्याय 33, मंत्र 4
युक्ष्वा
हि देवहूतमाम्̐२ऽ अश्वाम्̐२ऽ
अग्ने रथीर् इव ।
नि होता पूर्व्यः सदः ॥
यजुर्वेदः-संहिता
| अध्याय 33, मंत्र 5
द्वे विरूपे
चरतः स्वर्थे ऽ अन्यान्या वत्सम् उप धापयेते ।
हरिर् अन्यस्यां भवति स्वधावाञ्छुक्रो ऽ अन्यस्यां
ददृशे सुवर्चाः ॥
यजुर्वेदः-संहिता
| अध्याय 33, मंत्र 6
अयम् इह प्रथमो
धायि धातृभिर् होता यजिष्ठो ऽ अध्वरेष्व् ईड्यः ।
यम् अप्नवानो भृगवो विरुरुचुर् वनेषु चित्रं विभ्वं
विशे-विशे ॥
यजुर्वेदः-संहिता
| अध्याय 33, मंत्र 7
त्रीणि शता
त्री सहस्राण्य् अग्निं त्रिम्̐शच् च देवा नव चासपर्यन् ।
औक्षन् घृतैर् अस्तृणन् बर्हिर् अस्मा ऽ आद् इद्
होतारं न्य् असादयन्त ॥
यजुर्वेदः-संहिता
| अध्याय 33, मंत्र 8
मूर्धानं
दिवो ऽ अरतिं पृथिव्या वैश्वानरम् ऋत ऽ आ जातम् अग्निम् ।
कविम्̐ सम्राजम् अतिथिं जनानाम् आसन्न् आ
पात्रं जनयन्त देवाः ॥
यजुर्वेदः-संहिता
| अध्याय 33, मंत्र 9
अग्निर् वृत्राणि
जङ्घनद् द्रविणस्युर् विपन्यया ।
समिद्धः शुक्र ऽ आहुतः ॥
यजुर्वेदः-संहिता
| अध्याय 33, मंत्र 10
विश्वेभिः
सोम्यं मध्व् अग्न ऽ इन्द्रेण वायुना ।
पिबा मित्रस्य धामभिः ॥
यजुर्वेदः-संहिता
| अध्याय 33, मंत्र 11
आ यद् इषे
नृपतिं तेज ऽ आनट् शुचि रेतो निषिक्तं द्यौर् अभीके ।
अग्निः शर्धम् अनवद्यं युवानम्̐
स्वाध्यं जनयत् सूदयच् च ॥
यजुर्वेदः-संहिता
| अध्याय 33, मंत्र 12
अग्ने शर्ध
महते सौभगाय तव द्युम्नान्य् उत्तमानि सन्तु ।
सं जास्पत्यम्̐
सुयमम् आ कृणुष्व शत्रूयताम् अभि तिष्ठा महाम्̐सि
॥
यजुर्वेदः-संहिता
| अध्याय 33, मंत्र 13
त्वाम्̐
हि मन्द्रतमम् अर्कशोकैर् ववृमहे महि नः श्रोष्य् अग्ने ।
इन्द्रं न त्वा शवसा देवता वायुं पृणन्ति राधसा नृतमाः
॥
यजुर्वेदः-संहिता
| अध्याय 33, मंत्र 14
त्वे ऽ अग्ने
स्वाहुत प्रियासः सन्तु सूरयः ।
यन्तारो ये मघवानो जनानामूर्वान् दयन्त गोनाम् ॥
यजुर्वेदः-संहिता
| अध्याय 33, मंत्र 15
श्रुधि श्रुत्कर्ण
वह्निभिर् देवैर् अग्ने सयावभिः ।
आ सीदन्तु बर्हिषि मित्रो ऽ अर्यमा प्रातर्यावाणो
ऽ अध्वरम् ॥
यजुर्वेदः-संहिता
| अध्याय 33, मंत्र 16
विश्वेषाम्
अदितिर् यज्ञियानां विश्वेषाम् अतिथिर् मानुषाणाम् ।
अग्निर् देवानाम् अव ऽ आवृणानः सुमृडीको भवतु जातवेदाः
॥
यजुर्वेदः-संहिता
| अध्याय 33, मंत्र 17
महो ऽ अग्नेः
समिधानस्य शर्मण्य् अनागा मित्रे वरुणे स्वस्तये ।
श्रेष्ठे स्याम सवितुः सवीमनि तद् देवानाम् अवो ऽ
अद्या वृणीमहे ॥
यजुर्वेदः-संहिता
| अध्याय 33, मंत्र 18
आपश् चित्
पिप्यु स्तर्यो न गावो नक्षन्न् ऋतं जरितारस् त ऽ इन्द्र ।
याहि वायुर् न नियुतो नो ऽ अच्छा त्वम्̐
हि धीभिर् दयसे वि वाजान् ॥
यजुर्वेदः-संहिता
| अध्याय 33, मंत्र 19
गाव ऽ उपावतावतं
मही यज्ञस्य रप्सुदा ।
उभा कर्णा हिरण्यया ॥
यजुर्वेदः-संहिता
| अध्याय 33, मंत्र 20
यद् अद्य
सूर ऽ उदिते नागा मित्रो ऽ अर्यमा ।
सुवाति सविता भगः ॥
यजुर्वेदः-संहिता
| अध्याय 33, मंत्र 21
आ सुते सिञ्चत
श्रियम्̐ रोदस्योर् अभिश्रियम् ।
रसा दधीत वृषभम् ॥[ तं प्रत्नथा। अयं वेनः॥]
यजुर्वेदः-संहिता
| अध्याय 33, मंत्र 22
आतिष्ठन्तं
परि विश्वे ऽ अभूषञ् छ्रियो वसानश् चरति स्वरोचिः ।
महत् तद् वृष्णो ऽ असुरस्य नामा विश्वरूपो ऽ अमृतानि
तस्थौ ॥
यजुर्वेदः-संहिता
| अध्याय 33, मंत्र 23
प्र वो महे
मन्दमानायान्धसो ऽर्चा विश्वानराय विश्वाभुवे ।
इन्द्रस्य यस्य सुमखम्̐
सहो महि श्रवो नृम्णं च रोदसी सपर्यतः ॥
यजुर्वेदः-संहिता
| अध्याय 33, मंत्र 24
बृहन्न् इद्
इध्म ऽ एषां भूरि शस्तं पृथुः स्वरुः ।
येषाम् इन्द्रो युवा सखा ॥
यजुर्वेदः-संहिता
| अध्याय 33, मंत्र 25
इन्द्रेहि
मत्स्य् अन्धसो विश्वेभिः सोमपर्वभिः ।
महाम्̐२ऽ अभिष्टिर् ओजसा ॥
यजुर्वेदः-संहिता
| अध्याय 33, मंत्र 26
इन्द्रो वृत्रम्
अवृणोच्छर्धनीतिः प्र मायिनाम् अमिनाद् वर्पणीतिः ।
अहन् व्यम्̐सम्
उशधग् वनेष्व् आविर् धेना ऽ अकृणोद् राम्याणाम् ॥
यजुर्वेदः-संहिता
| अध्याय 33, मंत्र 27
कुतस् त्वम्
इन्द्र माहिनः सन्न् एको यासि सत्पते किं त ऽ इत्था ।
सं पृच्छसे समराणः शुभानैर् वोचेस् तन् नो हरिवो
यत् ते ऽ अस्मे ।
महाम्̐२ऽ इन्द्रो य ऽ ओजसा ।
कदा चन स्तरीर् असि ।
कदा चन प्र युच्छसि ॥
यजुर्वेदः-संहिता
| अध्याय 33, मंत्र 28
आ तत् त ऽ
इन्द्रायवः पनन्ताभि य ऽ ऊर्वं गोमन्तं तितृत्सान् ।
सकृत्स्वं ये पुरुपुत्रां महीम्̐
सहस्रधारां बृहतीं दुदुक्षन् ॥
यजुर्वेदः-संहिता
| अध्याय 33, मंत्र 29
इमां ते धियं
प्र भरे महो महीम् अस्य स्तोत्रे धिषणा यत् त ऽ आनजे ।
तम् उत्सवे च प्रसवे च सासहिम् इन्द्रं देवासः शवसामदन्न्
अनु ॥
यजुर्वेदः-संहिता
| अध्याय 33, मंत्र 30
विभ्राड्
बृहत् पिबतु सोम्यं मध्व् आयुर् दधद् यज्ञपताव् अविह्रुतम् ।
वातजूतो यो ऽ अभिरक्षति त्मना प्रजाः पुपोष पुरुधा
वि राजति ॥
यजुर्वेदः-संहिता
| अध्याय 33, मंत्र 31
उद् उ त्यं
जातवेदसं देवं वहन्ति केतवः ।
दृशे विश्वाय सूर्यम्̐
स्वाहा ॥
यजुर्वेदः-संहिता
| अध्याय 33, मंत्र 32
येना पावक
चक्षसा भुरण्यन्तं जनाम्̐२ऽ अनु ।
त्वं वरुण पश्यसि ॥
यजुर्वेदः-संहिता
| अध्याय 33, मंत्र 33
दैव्याव्
अध्वर्यू ऽ आ गतम्̐ रथेन सूर्यत्वचा ।
मध्वा यज्ञम्̐
सम् अञ्जाथे ।
तं प्रत्नथा । अयं वेनः। चित्रं देवानाम्(अ.वे.)
अयं वेनः
।
चित्रम् देवानाम् ॥
यजुर्वेदः-संहिता
| अध्याय 33, मंत्र 34
आ न ऽ इडाभिर्
विदथे सुशस्ति विश्वानरः सविता देव ऽ एतु ।
अपि यथा युवानो मत्सथा नो विश्वं जगद् अभिपित्वे
मनीषा ॥
यजुर्वेदः-संहिता
| अध्याय 33, मंत्र 35
यद् अद्य
कच् च वृत्रहन्न् उदगा ऽ अभि सूर्य ।
सर्वं तद् इन्द्र ते वशे ॥
यजुर्वेदः-संहिता
| अध्याय 33, मंत्र 36
तरणिर् विश्वदर्शतो
ज्योतिष्कृद् असि सूर्य ।
विश्वम् आ भासि रोचनम् ॥
यजुर्वेदः-संहिता
| अध्याय 33, मंत्र 37
तत् सूर्यस्य
देवत्वं तन् महित्वं मध्या कर्तोर् विततम्̐ सं जभार ।
यदेद् अयुक्त हरितः सधस्थाद् आद् रात्री वासस् तनुते
सिमस्मै ॥
यजुर्वेदः-संहिता
| अध्याय 33, मंत्र 38
तन् मित्रस्य
वरुणस्याभिचक्षे सूर्यो रूपं कृणुते द्योर् उपस्थे ।
अनन्तम् अन्यद् रुशद् अस्य पाजः कृष्णम् अन्यद् धरितः
सं भरन्ति ॥
यजुर्वेदः-संहिता
| अध्याय 33, मंत्र 39
बण् महाम्̐२ऽ
असि सूर्य बड् आदित्य महाम्̐२ऽ असि ।
महस् ते सतो महिमा पनस्यते द्धा देव महाम्̐२ऽ
असि ॥
यजुर्वेदः-संहिता
| अध्याय 33, मंत्र 40
बट् सूर्य
श्रवसा महाम्̐२ऽ असि सत्रा देव महाम्̐२ऽ
असि ।
मह्ना देवानाम् असुर्यः पुरोहितो विभु ज्योतिर् अदाभ्यम्
॥
यजुर्वेदः-संहिता
| अध्याय 33, मंत्र 41
श्रायन्त
ऽ इव सूर्यं विश्वेद् इन्द्रस्य भक्षत ।
वसूनि जाते जनमान ऽ ओजसा प्रति भागं न दीधिम ॥
यजुर्वेदः-संहिता
| अध्याय 33, मंत्र 42
अद्या देवा
ऽ उदिता सूर्यस्य निर् अम्̐हसः पिपृता निर् अवद्यात् ।
तन् नो मित्रो वरुणो मामहन्ताम् अदितिः सिन्धुः पृथिवी
ऽ उत द्यौः ॥
यजुर्वेदः-संहिता
| अध्याय 33, मंत्र 43
आ कृष्णेन
रजसा वर्तमानो निवेशयन्न् अमृतं मर्त्यं च ।
हिरण्ययेन सविता रथेना देवो याति भुवनानि पश्यन्
॥
यजुर्वेदः-संहिता
| अध्याय 33, मंत्र 44
प्र वावृजे
सुप्रया बर्हिर् एषाम् आ विश्पतीव बीरिट ऽ इयाते ।
विशाम् अक्तोर् उषसः पूर्वहूतौ वायुः पूषा स्वस्तये
नियुत्वान् ॥
यजुर्वेदः-संहिता
| अध्याय 33, मंत्र 45
इन्द्रवायू
बृहस्पतिं मित्राग्निं पूषणं भगम् ।
आदित्यान् मारुतं गणम् ॥
यजुर्वेदः-संहिता
| अध्याय 33, मंत्र 46
वरुणः प्राविता
भुवन् मित्रो विश्वाभिर् ऊतिभिः ।
करतां नः सुराधसः ॥
यजुर्वेदः-संहिता
| अध्याय 33, मंत्र 47
अधि न इन्द्रेषां
विष्णो सजात्यानाम् ।
इता मरुतो ऽ अश्विना ।
[तं प्रत्नथा
। अयं वेनः । ये देवासः । आ न इडाभिः । विश्वेभिः सोम्यं मधु ।] (अ.वे. 7.12, 16.
19, )
ओमासश् चर्षणीधृतः
॥
यजुर्वेदः-संहिता
| अध्याय 33, मंत्र 48
अग्न ऽ इन्द्र
वरुण मित्र देवाः शर्धः प्र यन्त मारुतोत विष्णो ।
उभा नासत्या रुद्रो ऽ अध ग्नाः पूषा भगः सरस्वती
जुषन्त ॥
यजुर्वेदः-संहिता
| अध्याय 33, मंत्र 49
इन्द्राग्नी
मित्रावरुणादितिम्̐ स्वः पृथिवीं द्यां मरुतः पर्वताम्̐२ऽ
अपः ।
हुवे विष्णुं पूषणं ब्रह्मणस्पतिं भगं नु शम्̐सम्̐
सवितारमूतये ॥
यजुर्वेदः-संहिता
| अध्याय 33, मंत्र 50
अस्मे रुद्रा
मेहना पर्वतासो वृत्रहत्ये भरहूतौ सजोषाः ।
यः शम्̐सते स्तुवते धायि पज्र ऽ इन्द्रज्येष्ठा
ऽ अस्माम्̐२ऽ अवन्तु देवाः ॥
यजुर्वेदः-संहिता
| अध्याय 33, मंत्र 51
अर्वाञ्चो
ऽ अद्या भवता यजत्रा ऽ आ वो हार्दि भयमानो व्ययेयम् ।
त्राध्वं नो देवा निजुरो वृकस्य त्राध्वं कर्ताद्
अवपदो यजत्राः ॥
यजुर्वेदः-संहिता
| अध्याय 33, मंत्र 52
विश्वे ऽ
अद्य मरुतो विश्व ऽ ऊती विश्वे भवन्त्व् अग्नयः समिद्धाः ।
विश्वे नो देवा ऽ अवसा गमन्तु विश्वम् अस्तु द्रविणं
वाजो ऽ अस्मे ॥
यजुर्वेदः-संहिता
| अध्याय 33, मंत्र 53
विश्वे देवाः
शृणुतेमम्̐ हवं मे ये ऽ अन्तरिक्षे य ऽ उप द्यवि
ष्ठ ।
ये ऽ अग्निजिह्वा ऽ उत वा यजत्रा ऽ आसद्यास्मिन्
बर्हिषि मादयध्वम् ॥
यजुर्वेदः-संहिता
| अध्याय 33, मंत्र 54
देवेभ्यो
हि प्रथमं यज्ञियेभ्यो ऽमृतत्वम्̐ सुवसि भागम् उत्तमम् ।
आद् इद् दामानम्̐
सवितर् व्य् ऊर्णुषे ऽनूचीना जीविता मानुषेभ्यः ॥
यजुर्वेदः-संहिता
| अध्याय 33, मंत्र 55
प्र वायुम्
अच्छा बृहती मनीषा बृहद्रयिं विश्ववारम्̐ रथप्राम् ।
द्युतद्यामा नियुतः पत्यमानः कविः कविम् इयक्षसि
प्रयज्यो ॥
यजुर्वेदः-संहिता
| अध्याय 33, मंत्र 56
इन्द्रवायू
ऽ इमे सुता ऽ उप प्रयोभिर् आगतम् ।
इन्दवो वाम् उशन्ति हि ॥
यजुर्वेदः-संहिता
| अध्याय 33, मंत्र 57
मित्रम्̐
हुवे पूतदक्षं वरुणं च रिशादसम् ।
धियं घृताचीम्̐
साधन्ता ॥
यजुर्वेदः-संहिता
| अध्याय 33, मंत्र 58
दस्रा युवाकवः
सुता नासत्या वृक्तबर्हिषः ।
आ यातम्̐ रुद्रवर्तनी । [ तं प्रत्नथा । अयं
वेनः ॥ ](अ.वे. 7.12.16)
यजुर्वेदः-संहिता | अध्याय 33, मंत्र 59
विदद् यदी
सरमा रुग्णम् अद्रेर् महि पाथः पूर्व्यम्̐ सध्र्यक् कः ।
अग्रं नयत् सुपद्य् अक्षराणाम् अच्छा रवं प्रथमा
जानती गात् ॥
यजुर्वेदः-संहिता
| अध्याय 33, मंत्र 60
नहि स्पशम्
अविदन्न् अन्यम् अस्माद् वैश्वानरात् पुर ऽ एतारम् अग्नेः ।
एम् एनम् अवृधन्न् अमृता ऽ अमर्त्यं वैश्वानरं क्षैत्रजित्याय
देवाः ॥
यजुर्वेदः-संहिता
| अध्याय 33, मंत्र 61
उग्रा विघनिना
मृध ऽ इन्द्राग्नी हवामहे ।
ता नो मृडात ऽ ईदृशे ॥
यजुर्वेदः-संहिता
| अध्याय 33, मंत्र 62
उपास्मै गायता
नरः पवमानायेन्दवे ।
अभि देवाम्̐२ऽ
इयक्षते ॥
यजुर्वेदः-संहिता
| अध्याय 33, मंत्र 63
ये त्वाहिहत्ये
मघवन्न् अवर्धन् ये शाम्बरे हरिवो ये गविष्टौ ।
ये त्वा नूनम् अनुमदन्ति विप्राः पिबेन्द्र सोमम्̐
सगणो मरुद्भिः ॥
यजुर्वेदः-संहिता
| अध्याय 33, मंत्र 64
जनिष्ठा ऽ
उग्रः सहसे तुराय मन्द्र ऽ ओजिष्ठो बहुलाभिमानः ।
अवर्धन्न् इन्द्रं मरुतश् चिद् अत्र माता यद् वीरं
दधनद् धनिष्ठा ॥
यजुर्वेदः-संहिता
| अध्याय 33, मंत्र 65
आ तू न ऽ
इन्द्र वृत्रहन्न् अस्माकम् अर्धम् आ गहि ।
महान् महीभिर् ऊतिभिः ॥
यजुर्वेदः-संहिता
| अध्याय 33, मंत्र 66
त्वम् इन्द्र
प्रतूर्तिष्व् अभि विश्वा ऽ असि स्पृधः ।
अशस्तिहा जनिता विश्वतूर् असि त्वं तूर्य तरुष्यतः
॥
यजुर्वेदः-संहिता
| अध्याय 33, मंत्र 67
अनु ते शुष्मं
तुरयन्तम् ईयतुः क्षोणी शिशुं न मातरा ।
विश्वास् ते स्पृधः श्नथयन्त मन्यवे वृत्रं यद् इन्द्र
तूर्वसि ॥
यजुर्वेदः-संहिता
| अध्याय 33, मंत्र 68
यज्ञो देवानां
प्रत्य् एति सुम्नम् आदित्यासो भवता मृडयन्तः ।
आ वो ऽर्वाची सुमतिर् ववृत्याद् अम्̐होश्
चिद् या वरिवोवित्तरासत् ॥
यजुर्वेदः-संहिता
| अध्याय 33, मंत्र 69
अदब्धेभिः
सवितः पायुभिष् ट्वम्̐ शिवेभिर् अद्य परि पाहि नो गयम् ।
हिरण्यजिह्वः सुविताय नव्यसे रक्षा माकिर् नो ऽ अघशम्̐स
ऽ ईशत ॥
यजुर्वेदः-संहिता
| अध्याय 33, मंत्र 70
प्र वीरया
शुचयो दद्रिरे वाम् अध्वर्युभिर् मधुमन्तः सुतासः ।
वह वायो नियुतो याह्य् अच्छा पिबा सुतस्यान्धसो मदाय
॥
यजुर्वेदः-संहिता
| अध्याय 33, मंत्र 71
गाव ऽ उपावतावतं
मही यज्ञस्य रप्सुदा ।
उभा कर्णा हिरण्यया ॥
यजुर्वेदः-संहिता
| अध्याय 33, मंत्र 72
काव्ययोर्
आजानेषु क्रत्वा दक्षस्य दुरोणे ।
रिशादसा सधस्थ ऽ आ ॥
यजुर्वेदः-संहिता
| अध्याय 33, मंत्र 73
दैव्याव्
अध्वर्यू आ गतम्̐ रथेन सूर्यत्वचा ।
मध्वा यज्ञम्̐
सम् अञ्जाथे । [ + तं प्रत्नथा । अयं वेनः ॥]
यजुर्वेदः-संहिता
| अध्याय 33, मंत्र 74
तिरश्चीनो
विततो रश्मिर् एषाम् अधः स्विद् आसी३द् उपरि स्विद् आसी३त् ।
रेतोधा ऽ आसन् महिमान ऽ आसन्त् स्वधा ऽ अवस्तात्
प्रयतिः परस्तात् ॥
यजुर्वेदः-संहिता
| अध्याय 33, मंत्र 75
आ रोदसी ऽ
अपृणद् आ स्वर् महज् जातं यद् एनम् अपसो ऽ अधारयन् ।
सो ऽ अध्वराय परि णीयते कविर् अत्यो न वाजसातये चनोहितः
॥
यजुर्वेदः-संहिता
| अध्याय 33, मंत्र 76
उक्थेभिर्
वृत्रहन्तमा या मन्दाना चिद् आ गिरा ।
आङ्गूषैर् आविवासतः ॥
यजुर्वेदः-संहिता
| अध्याय 33, मंत्र 77
उप नः सूनवो
गिरः शृण्वन्त्व् अमृतस्य ये ।
सुमृडीका भवन्तु नः ॥
यजुर्वेदः-संहिता
| अध्याय 33, मंत्र 78
ब्रह्माणि
मे मतयः शम्̐ सुतासः शुष्म ऽ इयर्ति प्रभृतो मे
ऽ अद्रिः ।
आ शासते प्रति हर्यन्त्य् उक्थेमा हरी वहतस् ता नो
ऽ अच्छ ॥
यजुर्वेदः-संहिता
| अध्याय 33, मंत्र 79
अनुत्तमा
ते मघवन् नकिर् नु न त्वावाम्̐२ऽ अस्ति देवता विदानः ।
न जायमानो नशते न जातो यानि करिष्या कृणुहि प्रवृद्ध
॥
यजुर्वेदः-संहिता
| अध्याय 33, मंत्र 80
तद् इद् आस
भुवनेषु ज्येष्ठं यतो जज्ञ ऽ उग्रस् त्वेषनृम्णः ।
सद्यो जज्ञानो नि रिणाति शत्रून् अनु यं विश्वे मदन्त्य्
ऊमाः ॥
यजुर्वेदः-संहिता
| अध्याय 33, मंत्र 81
इमा ऽ उ त्वा
पुरूवसो गिरो वर्धन्तु या मम ।
पावकवर्णाः शुचयो विपश्चितो ऽभि स्तोमैर् अनूषत ॥
यजुर्वेदः-संहिता
| अध्याय 33, मंत्र 82
यस्यायं विश्व
ऽ आर्यो दासः शेवधिपा ऽ अरिः ।
तिरश् चिद् अर्ये रुशमे परीरवि तुभ्येत् सो ऽ अज्यते
रयिः ॥
यजुर्वेदः-संहिता
| अध्याय 33, मंत्र 83
अयम्̐
सहस्रम् ऋषिभिः सहस्कृतः समुद्र ऽ इव पप्रथे ।
सत्यः सो ऽ अस्य महिमा गृणे शवो यज्ञेषु विप्रराज्ये
॥
यजुर्वेदः-संहिता
| अध्याय 33, मंत्र 84
अदब्धेभिः
सवितः पायुभिष् ट्वम्̐ शिवेभिर् अद्य परि पाहि नो गयम् ।
हिरण्यजिह्वः सुविताय नव्यसे रक्षा माकिर् नो ऽ अघशम्̐स
ऽ ईशत ॥
यजुर्वेदः-संहिता
| अध्याय 33, मंत्र 85
आ नो यज्ञं
दिविस्पृशं वायो याहि सुमन्मभिः ।
अन्तः पवित्र ऽ उपरि श्रीणानो ऽयम्̐
शुक्रो ऽ अयामि ते ॥
यजुर्वेदः-संहिता
| अध्याय 33, मंत्र 86
इन्द्रवायू
सुसंदृशा सुहवेह हवामहे ।
यथा नः सर्व ऽ इज् जनो ऽनमीवः संगमे सुमना ऽ असत्
॥
यजुर्वेदः-संहिता
| अध्याय 33, मंत्र 87
ऋधग् इत्था
स मर्त्यः शशमे देवतातये ।
यो नूनं मित्रावरुणाव् अभिष्टय ऽ आचक्रे हव्यदातये
॥
यजुर्वेदः-संहिता
| अध्याय 33, मंत्र 88
आ यातम् उप
भूषतं मध्वः पिबतम् अश्विना ।
दुग्धं पयो वृषणा जेन्यावसू मा नो मर्धिष्टम् आ गतम्
॥
यजुर्वेदः-संहिता
| अध्याय 33, मंत्र 89
प्रैतु ब्रह्मणस्
पतिः प्र देव्य् एतु सूनृता ।
अच्छा वीरं नर्यं पङ्क्तिराधसं देवा यज्ञं नयन्तु
नः ॥
यजुर्वेदः-संहिता
| अध्याय 33, मंत्र 90
चन्द्रमा
ऽ अप्स्व् अन्तर् आ सुपर्णो धावते दिवि ।
रयिं पिशंगं बहुलं पुरुस्पृहम्̐
हरिर् एति कनिक्रदत् ॥
यजुर्वेदः-संहिता
| अध्याय 33, मंत्र 91
देवं-देवं
वो ऽवसे देवं-देवम् अभिष्टये ।
देवं-देवम्̐
हुवेम वाजसातये गृणन्तो देव्या धिया ॥
यजुर्वेदः-संहिता
| अध्याय 33, मंत्र 92
दिवि पृष्टो
ऽ अरोचताग्निर् वैश्वानरो बृहन् ।
क्ष्मया वृधान ऽ ओजसा चनोहितो ज्योतिषा बाधते तमः
॥
यजुर्वेदः-संहिता
| अध्याय 33, मंत्र 93
इन्द्राग्नी
ऽ अपाद् इयं पूर्वागात् पद्वतीभ्यः ।
हित्वी शिरो जिह्वया वावदच् चरत् त्रिम्̐शत्
पदा न्य् अक्रमीत् ॥
यजुर्वेदः-संहिता
| अध्याय 33, मंत्र 94
देवासो हि
ष्मा मनवे समन्यवो विश्वे साकम्̐ सरातयः ।
ते नो ऽ अद्य ते अपरं तुचे तु नो भवन्तु वरिवोविदः
॥
यजुर्वेदः-संहिता
| अध्याय 33, मंत्र 95
अपाधमद् अभिशस्तीर्
अशस्तिहाथेन्द्रो द्युम्न्य् आभवत् ।
देवास् त ऽ इन्द्र सख्याय येमिरे बृहद्भानो मरुद्गण
॥
यजुर्वेदः-संहिता
| अध्याय 33, मंत्र 96
प्र व ऽ इन्द्राय
बृहते मरुतो ब्रह्मार्चत ।
वृत्रम्̐ हनति वृत्रहा शतक्रतुर् वज्रेण शतपर्वणा
॥
यजुर्वेदः-संहिता
| अध्याय 33, मंत्र 97
अस्येद् इन्द्रो
वावृधे वृष्ण्यम्̐ शवो मदे सुतस्य विष्णवि ।
अद्या तम् अस्य महिमानम् आयवो ऽनु ष्टुवन्ति पूर्वथा
।
इमा ऽ उ त्वा
। यस्यायम् । अयम्̐ सहस्रम् । ऊर्ध्व ऽ ऊ षु णः ॥
॥इति यजुर्वेदः त्रयस्त्रिंशत्तमोऽध्यायः॥
अन्य अध्याय पढ़ने के लिए यहाँ क्लिक
0 comments